:بسم الله:
انا اكره هذا المنتدى
كانت تلك الجمله هى بداية الحوار الذى دار امامى امس بين عضوتين فى احد المنتديات الاسلاميه وقررت ان انقل الحوار لكم كما حدث فقد كان كالاتى
1:اخبارك ايه فى المنتدى..مبقتيش بتدخلى ليه كتير
2:انا اكره هذا المنتدى
1:بتقولى ايه ليه طيب؟
2: ايوا بكرهه بجد لان اعضاؤه منافقين
1: لا حرام عليكى دى ناس محترمه جدا
2: بصى اولا مش كلهم لكن اغلبهم منافقين وبعدين انا مقلتش انهم مش محترمين
1: وازاى بقى منافقين
2: هما يمكن ميعرفوش انهم منافقين ولا حاسين بكدا لكن دى الحقيقه مع الاسف
1:حقيقة ايه ومنافقين ايه وبعدين انتى بتتكلمى على المنتدى زى ميكون مش منتدى اسلامى
2: اسلامى؟هههههههههههههه ومين قال انه اسلامى
1:ايه مش اسلامى كمان
2: يا بنتى بلاش نضحك على نفسنا.هوا اى منتدى عشان فيه كام موضوع عن الحجاب والتوبه والاسلام والرسول يبقى منتدى اسلامى
لازم المنتدى ده يعنى المديرين والمشرفين عليه على الاقل يكونوا ناس ملتزمين
1:وهما فى رأيك مش ملتزمين؟
2: اى التزام اللى بتتكلمى عنه..يا اختى ابسط معانى الالتزام شوفيه فى الردود بينهم وبين بعض وبين الاعضاء والعضوات والهزار والضحك يمين وشمال بمناسبة وغير مناسبه
وعلاقات الصحوبيه اللى على الملأ
1 :صحوبية ايه لا مش صحيح الكل فى المنتدى بيعتبر جميع الاعضاء اخوات ليه
2:اخوات..ههههههههه..ده كلام بيضحكو بيه على نفسهم بيسمو نفسهم اخوات لكن شوفى انا اراهنك ان الغالبيه العظمى منهم من الجنسين واخدين اميلات بعض ومش بعيد ارقام الموبيلات كمان عشان يطمنو على بعض
مش اخوات بقى.......هوا ده من الاسلام والالتزام فى شىء؟؟
1:انتى مكبره الامور اوى بجد مش للدرجادى
2 :والله انا مصغره الامور مش مكبراها ..يابنتى الجواب بيبان من عنوانه والملتزمين تعاملهم مبيبقاش كدا معلش وانتى عارفه
طب هقلك مثال صغير تفتكرى من كل الادراه والمشرفات واللى بيعملو مواضيع رهيبه جدا ورائعه جدا تفتكرى كام واحده منهم محجبه حجاب شرعى؟ولا بتحط اى ميك اب او برفان.؟ وكام واحد فى رأيك من المشرفين بيصلى كل الصلوات فى المسجد؟ ومش بيسمع اغانى؟وبيغض بصره عن التليفزيون والشارع؟وكام واحد بيصلى الفجر حاضر بعد ميسهر طول الليل بحجة انه بيعمل مواضيع للمنتدى؟ولا هما مش عارفين انه لا خير فى عمل يلهى عن الصلاه
1: الله اعلم ..وبعدين انتى مالك ماكل واحد حر
2:ايوا كل واحد حر فى حياته الشخصيه لكن ميجوش يعملو منتدى ويقولو اسلامى ويبقو فى نظر الناس رمز الالتزام ويبقى الكلام بينهم والمشاركات بالشكل ده
1 :انا شايفه انك ملكيش دعوه بحد وتدخلى تحطى اللى انتى عايزاه بنيه سليمه وليكى اسلوبك وطريقتك ملكيش دعوه بحد
2 :ايوا فعلا انا كنت بقول كدا بس اكتشفت للاسف ان المكان المفروض اننا نشجع بعض فيه على الطاعه .اصبح فى نفس الوقت مصدر للفتنه وللاسف انا بقيت اشوف ده فى اغلب المنتديات الاسلاميه
وزى مقلتلك فيه اللى فعلا دخلو طريق النفاق وهما مش حاسيين وفيه اللى بينحرفو للطريق وهيبقو منهم وهما بردو مش حاسيين
1: يااااربى.... على كل حال ربنا اعلم بالنوايا
2 :فعلا ربنا اعلم بالنوايا لكن الشيطان بيضحك عليهم يبقى فى الاول داخل يحط مواضيع عشان يؤجر لكن انا متئكده ان الهدف بعد فتره بيتغير العضو الجديد بيتشجع عشان يبقى نشيط والنشيط بيتشجع عشان يبقى مميز والمميز عشان يبقى مشرف والمشرف عشان يبقى اشهر وافضل مشرف وحتى لو فرضنا ان ده تنافس ويعتبر تنافس شرعى ومحلل لكن هما بينسو انهم بسبب سلوكهم ومشاركتهم المعلنه للجميع دى ممكن يخدو سيئات اكتر من الحسنات اللى دخلين اصلا عشانها لان زى مقلتلك المفروض ان دول رمز للملتزمين لكن والله دى مش سلوكيات ملتزمين ومتنسيش انا بتكلم عن البعض وليس الكل
1 :افهم من كلامك انك هتسيبى المنتدى؟
2 :بصراحه لسا مقررتش لكن انا ادخل من ان لاخر حتى لا احتك به كثيرا وبجد انا بدعى انه يتغير ويكون بالفعل منتدى اسلامى بمعنى الكلمه لان الحجات دى ممكن تضيع ثواب كبيييييييير اوى
1 : الله المستعان.ربنا يهدينا جميعا
انتهى الحوار
لن اكذب عليكم فمنذ ان انتهى الحوار وانا افكر به رغم اننى لم اشارك فيه ولم انقله لكم الا لاننى شعرت انها ربما تكون رساله من الله لكل واحد فينا ليراجع نفسه فى كل مايخص دخوله المنتدى او النت عموما ونيته وردوده ومشاركاته ..ولن اكذبكم القول فقد شجعنى على نقله لكم اننى شعرت بأن تلك الفتاه وان كانت ربما تغالى وتبالغ فى الحديث الا اننى شعرت انها صائبه فى كثير مما تقول او اننى تخيلت هل يمكن ان يقال مثل هذا الحديث عن منتدنا؟ وهل عندنا من الحجج ما يكفى للرد عليه اذا وجه لنا؟
ارجوكم اعذرونى ولا تغضبو منى فنحن جميعا نسعى بكل الخطى ان نجعل هذا المنتدى اسلاميا بكل ما اوتيت الكلمه من معنى
ونحن بشر وقد نخطأ ولا بأس طالما نذكر بعض وزى مكلنا عارفين احنا اغلبنا لا نعرف بعض يعنى مش داخلين همنا شكلنا ايه قدام بعض ولا هدفنا شهره ولا الدنيا دى كلها تسوى شىء ..لكن مين عارف مش يمكن بجد لو كلنا نوينا بس نصحح اخطائنا وندخل لله بس ونجدد نيتنا على كدا. يمكن ربنا يجمع كل اعضاء هذا المنتدى فى الجنه ونتعرف على بعض هناك ونفكر بعض كمان بمواضيع ومواقف المنتدى اللى اجتمعنا فيها على طاعة الله.
انا اسفه بجد على الاطاله واعذرونى مره اخرى
الحوار قدامكم واللى عنده اى رد-تعليق -مشاركه اكيد هيسعدنى انكم تتفاعلو وتبدو رأيكم بكل صراحه وشجاعه كالمعتاد.
احترامى وتقديرى للجميع
الجمعة أبريل 03, 2009 11:28 pm
